文 / 刘会明
52 寡妇嫂自叹
十五唔敢看月光，过年唔敢着新装。
心中有话有人讲，一生孤枕守空房。
紧想紧真紧难捱，想来想去到鸡啼。
怕听人家郎喊妹，怕看堂前祖公牌。
一一一一
53 你想断情拿刀来
两支八布做哥衣，钩针密缝连到你。
你今来讲断情话，单层马褂妹有理。
花钵肚里种芙蓉，一心一意望你浓。
今番来讲断情话，枉费阿哥情义重。
故意刁难涯也知，讲好讲坏都系你。
瓦窑顶上放牛扼，几多冤屈你唔知。
日头转影树转阴，先日两人共条心。
今日来讲断情话，松毛做菜会刺心。
先日同涯糖咐甜，今日丢涯雪咐冷。
十五架桥十六拆，样般妹子心咐偏。
想到断情泪就来，愁愁结结心难开。
丝线打结吞落肚，你爱同涯解开来。
先日爱涯一团金，今日丢涯滑眼针。
冷水来淋隔夜饭，食落下肚冷涯心。
当日爱涯喊亲哥，今日丢涯冷凳坐。
大风吹到柑子树，害涯捡到桔咐多。
米筛筛米簸箕裁，米系心肝壳系涯。
自细包你都咐好，一上砻甑就去涯。
先日同涯糖咐甜，今日丢涯雪咐冷。
糖锅拿来炒猪胆，先甜后苦心唔甘。
拆得菜园来种蕉，先日有园今就有。
路上碰到唔相问，犁壁有你面咐敖。
先日当涯一枝花，今日丟涯当泥沙。
十字街头买条蔗，食了甜水就去渣。
紧想紧真眼泪来，嬲个位迹都还在。
今日来讲断情事，钝刀破篾想唔开。
交条人情天咐难，断条人情一时间。
甜酒变酸就容易，酸酒变甜就艰难。
乌鸦落地做鸡啼，无缘无故来去涯。
老蟹调头有头榻，水桶装蛇困死涯。
看到天光天有光，打开窗门看月光。
先日有双嫌夜短，今日有双嫌夜长。
去年冬来嬲到正，热情如同过火坑。
缘份满哩情断了，寒风细雨有咐冷。
秆堆蛤蟆气难消，脚踏镰刀会嫖刀。
纺车有棉情断了，灯草落炉心火烧。
一一一一
54 心头咐热样得冷
妹子爱断涯唔断，妹子食硬涯食软。
妹子虽然硬过铁，唔奈阿哥水咐软。
欺文就系涯亲母，讲起断情哭得多。
村村也有斯文既，唔当阿哥较柔和。
可惜就系嫩姣莲，讲起断情叫得狠。
处处也有花样女，唔当娇莲较柔然。
点火来烧思茅坪，五更下露草返生。
六月天光烧灯草，心头咐热样得冷。
先口两人糖咐甜，今日两人雪咐冷。
前月架桥这月拆，唔曾想到就有行。
当初唔连你爱话，今日断情就心生。
丝线织网千百结，几多人工织到成。
上坑流水到下坑，讲起断情心就冷。
松树架桥水打走，样得原路再来行。
一一一一2017.10.13
|
